أكلة سهلة لعيد الحب

اتمنى إن الأكلات اللي قدّمناها لكِ الأيام اللي فاتت تكون عجبتكم..

والنهارده حبيت اقدّم لكِ وصفة لذيذة وبسيطة تقدري تعمليها بأبسط التكاليف لأسرتك

بمناسبة عيد الحب علشان تحتفلي معاهم وهي..

الباسطا فلورا بمربى الفراولة

المقادير:

• كوبين وربع دقيق.   
• 2 بيض كبير.

• نصف كوب خليط من السمن والزبد.
• كوب سكر بودرة.    
• معلقة فانيليا.
• معلقة بيكنج باودر.  
• نصف كوب مربى فراولة.
الطريقة:
1. اخلطي السمن مع السكر كويس.
2. اضربي البيض وضيفي عليه الفانيليا.
3. ضيفي البيض على خليط السمن وامزجيهم مع بعض.
4. حطي البيكنج باودر على الدقيق وقلبيه، وبعد كده حطيه تدريجياً على الخليط السابق لغاية ما يتكوّن عندك عجينة متماسكة ما تلزقش بإيديكِ (ممكن تزودي شوية دقيق لو احتاجتِ).
5. صبي 3/4 العجينة في الصينية وافرديها بسمك 1 سم وحطي المربى عليها.
6. بالعجينة المتبقية اعملي أعمدة مختلفة الأطوال، ورصيها على المربى في الصينية متقاطعة طولا وعرضا.
7. حطي الصينية في الفرن في درجة حرارة متوسطة لمدة 25 دقيقة لغاية ما يحمر القاع والجوانب، وبعد كده افتحي الشواية لمدة دقيقتين علشان يحمر الوجه.
8. سيبيها لغاية ما تبرد وقطعيها وقدّميها.. وبألف هنا وشفا.

وفي النهاية نتمنى إن الطريقة تكون سهلة عليكم وتجرّبوها بنفسكم...
وتبعتوا تقولو لى رأيكم فيها إيه..

أنشر الموضوع فى المفضلات الاجتماعية من هنا